मुक्तिको बाटो

(नेपाली लोक लयमा)
संसारका धेरै स्वनामधन्य योगी, तपस्वी र अध्यात्म चिन्तक विद्वान्हरूले मुक्तिको मार्ग पहिल्याउन ठूलो अन्वेषण र साधना गरेका छन् । सबैको निचोड छ, आत्माको शान्तिबिना मुक्तिको मार्ग भेटिँदैन, भेटिए पनि चिन्न सकिन्न, चिने पनि त्यो बाटोमा हिँड्न सकिन्न । तसर्थ, मनको शान्ति मुक्तिको पहिलो शर्त हो । त्यसैगरी सबै किसिमको वासनाबाट मुक्त भएर धर्मको मार्गमा हिँड्न योग्य हुनु नै शायद मोक्षप्राप्तिको अर्को शर्त हो । यो प्रार्थना र भजनको सानो सङ्ग्रहले मुक्तिको बाटो पहिल्याउन मद्दत गर्ला कि नगर्ला यकिन भन्न नसकिए पनि मनमा अटाई नअटाई छताछुल्ल हुन खोजिरहेका सांसारिक चिन्ता र जीवनलाई पथभ्रष्ट गराउन उद्धत सबै किसिमका वासनाबाट भक्तजनलाई केही मात्रामा भए पनि त्राण दिन भने अवश्य मद्दत गर्नेछ ।
आत्मिक शान्तिको खोजीमा भौँतारिरहेका भक्तजनलाई विभिन्न देवी देवताको प्रार्थना, भजन लगायत ग्रहशान्ति, शिवकवच, दुर्गाकवच, गीतासार र रुद्रगीता जस्ता गहन कृतिको सरल नेपाली लोकलयमा अनुवाद गरेर यस सङ्ग्रहका विद्वान् लेखकले ठूलो गुनलाउनु भएको छ । म जस्तो संस्कृत भाषा र धर्मको अल्पज्ञका लागि त यो एउटा गाइड बुक जस्तै हो ।
हरिभक्त सिग्देल ‘महेश’ मेरा अग्रज र अनन्य मित्र हुनुहुन्छ । आध्यात्मिक ज्ञान र चिन्तनको क्षेत्रमा निरन्तर क्रियाशील हरिभक्तजीको साधना ईष्र्यालाग्दो छ । उहाँको अनुशासित र सदाचारपूर्ण जीवनशैली, आध्यात्मिक निष्ठा र समर्पण एवं मानवीय संवेदना र दायित्वबोध अनुकरणीय र नमनयोग्य छ । “उहा“ले जस्तै हिन्दू धर्मलाई बुझेका अन्य विद्वान्हरूले पनि हाम्रा गहन धार्मिक कृतिहरूको सरल नेपालीमा अनुवाद गरिदिए त्यसले धर्मान्तरणलाई समेत निरुत्साहित गर्नेछ” भन्ने मेरो मान्यता छ ।
सिग्देलजीको अविश्रान्त कलमबाट यस्ता धेरै रचनाहरू निसृत भइरहुन् भन्ने कामना गर्दछु ।

डा. जुगल भूर्तेल
मित्रपार्क, काठमाडौं
२०७३÷०१÷०१

No Comments